Bord for bord, skrue for skrue…

Førre helg vart nok ei dugnadshelg i huset. Kjeks vart kjøpt inn og med kaffi og saft vart det god stemning! Tregolvet i andre etasje vart teken opp bord for bord og nummert. Mens ein gjeng var inne og fekk opp golvborda, stod ein annan i sola og reingjorde dei for støv og anna som hadde kome ned i mellom spora gjennom åra.

Kjell-Gunnar kom frå Bergen og fekk automatisk ansvaret for å køyra kvart golvbord gjennom avrettaren for å pusse av dei laget med lakk og mindre ujevnheitar. Eit par timar og x-antall sikringar seinare vart dei stabla i stova, klar til å takast opp og leggjast ned att att i andre etasje.

Etter å ha lagt inn nye støttebjelkar for å minke svika i golvet har me lagt ned isolasjon i golvet. Dette for å minke støyen opp og ned mellom første og andre etasje, men også for å holde varmen i stua når me varmar den opp. Me treng altså ikkje «fyre for kråkene» (Åge sine ord) heretter.

Isoleringa av golvet vart ferdig på tirsdag, og i går kveld kunne me byrje å leggje ned att golvet. Me merkar at det er eit gamalt golv (eller sjarmerande som me kallar det) som vert lagt ned. Tross forsøket på å jevne overflata ut, er det fortsatt ein liten pussejobb som står på programmet før golvet kan malast og takast i bruk…

Kommentarar

Legg att ein kommentar ved å trykkje her eller rull deg ned på sida